ეროვნულ დემოკრატიული პარტიის თავმჯდომარე ბაჩუკი ქარდავა სოციალურ ქსელში პოსტს აქვეყნებს:

ამასაც მოვესწარით, პოლიტიკოსის, დეპუტატის თოქ შოუში სტუმრობა და აზრის გამოხატვა დანაშაულია!თადუმაძეს ივანიშვილი მგონი ხამურაბიში ეშლება! ქვეყანაში კონსტიტუცია და კანონი გაუქმებულია, მუშაობს მხოლოდ ივანიშვილის პირადი დაუწერელი კოდექსი! წაართვა ქართველებს სახელმწიფო, მე ერთადერთ გამოსავალს ვხედავ, მთელი ქვეყნის მასშტაბით გაიშალოს ზეპარტიული, კონსოლიდირებული წინააღმდეგობის მოძრაობა ,,არა ივანიშვილის რუსულ რეჟიმს”!

საქართველოს მთავარი პროკურატურა გაერთიანებული ოპოზიციის ლიდერს, ნიკა მელიას ტელეკომპანია „კავკასიაში“ სტუმრობის გამო საგამოძიებო ორგანოში იბარებს და ღიად ემუქრება.

თადუმაძის უწყება, დღეს გავრცელებულ განცხადებაში ფაქტობრივად აღიარებს, რომ საქართველოს პარლამენტის წევრს გადაადგილებას უზღუდავს და შინაპატიმრობაში ჰყავთ.

განცხადებაში ნათლად იკვეთება, რომ პარლამენტის წევრს, პოლიტიკური საქმიანობა შეზღუდული აქვს.

“როგორც საზოგადოებისთვის ცნობილია, 2019 წლის 27 ივნისს, თბილისის საქალაქო სასამართლოს განჩინებით, ჯგუფური ძალადობის ხელმძღვანელობასა და მასში მონაწილეობისთვის ბრალდებულ ნიკანორ მელიას აღკვეთის ღონისძიების სახით შეეფარდა გირაო 30 000 ლარის ოდენობით. ამასთან, დამატებითი შეზღუდვის სახით მას აეკრძალა საცხოვრებელი ადგილის დატოვება საგამოძიებო ორგანოს ინფორმირების და თანხმობის გარეშე, საზოგადოებრივი თავშეყრის ადგილას საჯარო განცხადებებით გამოსვლა და მოწმეებთან ნებისმიერი სახის კომუნიკაცია.

2019 წლის 2 ივლისის, თბილისის სააპელაციო სასამართლოს განჩინებით, ძალაში დარჩა თბილისის საქალაქო სასამართლოს განჩინება ბრალდებულის მიმართ აღკვეთის ღონისძიების გამოყენების შესახებ და ბრალდებულ ნიკანორ მელის მიმართ დამატებით გამოყენებული იქნა ელექტრონული მონიტორინგი.

პირველი მომართვისთანავე, ნიკანორ მელიას პროკურატურისგან მიეცა თანხმობა გამოცხადებულიყო საქართველოს პარლამენტში და განეხორციელებინა სადეპუტატო უფლებამოსილება. გარდა ამისა, მას აქვს სრულყოფილი კომუნიკაცია მედიასთან საცხოვრებელი სახლიდან.

გენერალური პროკურატურის ამგვარი დამოკიდებულების მიუხედავად, 2019 წლის 10 სექტემბერს, ნიკანორ მელიამ დემონსტრაციულად დაარღვია თბილისის საქალაქო სასამართლოს განჩინებით დაწესებული აკრძალვა და საკუთარი სურვილით, საგამოძიებო ორგანოს უარის მიუხედავად, დატოვა საცხოვრებელი ადგილი.

აქედან გამომდინარე, ნიკანორ მელია დაბარებულია საქართველოს პროკურატურაში, რათა განემარტოს, რომ აღნიშნული ქმედება წარმოადგენს აღკვეთის ღონისძიების გამოყენების პირობის დარღვევას და მსგავსი კანონსაწინააღმდეგო ფაქტის განმეორების შემთხვევაში, მის მიმართ შესაძლოა გამოყენებულ იქნას უფრო მკაცრი აღკვეთის ღონისძიება”- ნათქვამია განცხადებაში.