საქართველოს საპატრიარქო დეკანოზი მამალაძის გათავისუფლების მოთხოვნით განცხადებას ავრცელებს
საპატრიარქო დეკანოზი მამალაძის გათავისუფლებას ითხოვს. მათი თქმით არ აქვს მნიშვნელობა რამდენად რეალურია მისი ჯანმრთელობის მდგომარეობის გაუარესების შესახებ ცნობები, ამის მიუხედავად ის მაინც უნდა გათავისუფლდეს.
“გავრცელებული ინფორმაციით, ა.წ. 17 მარტს უნდა შედგეს სასამართლო პროცესი დეკანოზ გიორგი მამალაძისთვის სასჯელის გადავადებასთან დაკავშირებით.
როგორც ცნობილია, 2019 წლის 31 ოქტომბრის წმინდა სინოდის სხდომაზე მიღებული განჩინების საფუძველზე, საქართველოს კათალიკოს-პატრიარქმა მიმართა საქართველოს პრეზიდენტს მსჯავრდებული დეკანოზის შეწყალების შესახებ “მისი ოჯახის რთული მდგომარეობისა და არაერთგზისი თხოვნის გათვალისწინებით”.
ეკლესიის პოზიცია უცვლელია.
და ამჟამადაც, როდესაც მიმდინარეობს მსჯელობა მისთვის ჯანმრთელობის მდგომარეობის გამო სასჯელის გადავადებაზე, ჩვენ კვლავაც ვადსტურებთ, რომ ვემხრობით როგორც მისი შეწყალების საკითხს, ასევე სხვა სახით შეღავათის მიცემასაც მიუხედავად იმისა, რამდენად შეესაბამება რეალობას სასჯელის გადავადების მოტივი.” – აცხადებს საქართველოს საპატრიარქო.
